ओरेकद्वारा सर्लाहीको आइसोलेसनहरुमा कोरोना संक्रमितहरुलाई मनोविमर्श सेवा प्रदान गरियो

कोरोना विशेष देश समाचार

३ असोज, सर्लाही। महिला पुनःस्थापना केन्द्र (ओरेक) ले विश्वव्यापी रुपमा फैलिएको कोरोना भाइरस (कोभिड–१९) संक्रमणको विषम परिस्थितिमा संक्रमित भएर सर्लाहीको आइसोलेसनमा बसेका बिरामीहरुलाई मनोविमर्श सेवा प्रदान गरेको छ । ओरेकको सर्लाही स्थित शाखाको अगुवाइमा मानवअधिकारकर्मी, सामाजिक अभियन्ता र संचारकर्मी सहितको टोली कोरोना भाइरसबाट संक्रमित भएर लामो समयावधिसम्म उपचारका लागि आइसोलेसनमा बसेका बिरामीहरुमा आएको मानसिक तनाव र त्यसको असरलाई कम गर्न सर्लाहीको ४ वटा आइसोलेसनहरुको भ्रमण गरि संक्रमित ब्यक्तिहरुलाई मनोसामाजिक बिमर्श सेवा प्रदान गरेका हुन । कोरोना भाइरस संक्रमणको सन्त्रास, आइसोलेसनमा भएका बेला हुने चिन्ता र तनावलाई कम गर्न सर्लाही जस्तै अन्य जिल्लाहरुमा पनि मनोविमर्शकर्ताहरु मार्फत सेवा प्रदान गरिरहेको ओरेक नेपाल सर्लाही शाखाकी कार्यक्रम अधिकृत दिवानी श्रेष्ठ घमिरेले बताइन ।

सर्लाहीको सदरमुकाम मलंगवा, कविलासी, लालबन्दी र हरिवन नगरपालिकामा गरि ४ वटा आइसोलेसनहरु संचालनमा रहेका छन् । जसमध्ये मलंगवाको आइसोलेसनमा ६ जना, हरिवनको आइसोलेसनमा १ जना बिरामीहरु रहेका छन् भने अन्य दुइवटा हाल खाली अवस्थामा रहेको छ । भ्रमणको उदेश्य मनोपरामर्श सेवा प्रदान गर्ने मात्र नभइ सम्बन्धित पालिकाले आइसोेसनमा उपलब्ध गराएका सेवा, सुविधाहरुको साथै त्यहाँ रहेका बिरामीहरुले आफ्नो बसाईको बेला भोगेको समस्या तथा अनुभवको बारेमा उनीहरुबाटै जानकारी लिने पनि रहेको टोलीका तथा युवा समाज कल्याण, सर्लाहीका सदस्य एवं युवा सामाजिक अभियन्ता कृष्णा राउतले बताए ।

संक्रमित भइ होम आइसोलेसनमा बसेर यसको नियमित उपचार प्रक्रियामा सहभागी हुन नसकिने साथै स्वास्थ्य सम्बन्धि मापदण्डको पालना गर्ने तथा यसका लागि उपयुक्त वातावरणको निर्माण पनि गर्न नसक्ने भएकोले संक्रमितहरुलाई आइसोलेसनमै बस्न उपयुुक्त रहेको कोरोना संक्रमित बिरामीले भने । कुनैपनि अप्ठ्यारो परिस्थिति आउँदा आइसोलेसनमा खटिएका स्वास्थ्यकर्मी, सुरक्षाकर्मी र कर्मचारीहरु बोलाएको समयमा तुरुन्त उपस्थित भएर असहज परिस्थिति लाई सहज बनाउने , उचित सल्लाह दिने र एक्लै बस्दा मनमस्तिष्कमा उत्पन्न हुने नकारात्मक सोंच, विचार आउन नदिन बेलाबेलामा मनोरञ्जनात्मक क्रियाकलापहरु गर्ने गरेको उनीहरुले बताए ।

जिल्लामा अहिले फेला परेका अधिकांश संक्रमितहरु हुनेखाने घरपरिवारका रहेकाले पालिकाले संचालन गरेको आइसोलेसनमा बस्न नचाहेपछि संक्रमित ब्यक्तिले पालना गर्नुपर्ने सम्पूर्ण नियमहरुको नियमित पालना गर्नुपर्ने छ भन्ने लिखित रुपमा सशर्त कागज गराएर उनीहरूलाई होम आइसोलेसनमा बस्न अनुमति दिएको जिल्ला समन्वय समिति, सर्लाहीका प्रमुख मेथुर चौधरीले बताए ।

Leave a Reply

Your email address will not be published. Required fields are marked *